朱雯迪（中）接任國際美業評審總會會長，曾裕（右）及日本城合夥創辦人魏麗霞齊捧場。
香港人壓力大，家庭、職場兼顧嘅女性更加唔易做，「美容天后」曾裕（Joyce）就話，佢做美容呢行，成日同客人一邊傾偈一邊做療程，發現吐最多苦水嘅客人多數係做護士或教師，有啲人仲講到流眼淚添，喺佢眼中，護士同教師可能係最辛苦嘅行業。
早前國際美業評審總會舉行就職典禮，美容界人士齊聚。Joyce都有到場，佢話做美容呢行好有趣，從客人處都可以分享到好多見聞，譬如，客人會呻護士人手短缺，成日一個人對住幾十個病人，壓力好大；至於教師面對香港教育制度隔幾年就大改，改到家長同學生都癲，何況係老師？聽落呢個另類調查都幾準喎！
總會會長朱雯迪就話，總會致力推動美容師取得專業認可，以便持續進修，亦係配合政府推出嘅資歷架構。無論做邊行最緊要終身學習，所以佢忙到就職禮一完就會飛去醫學美容大行其道嘅韓國取經，以緊貼潮流腳步。
第一手消息請下載on.cc東網
