政壇：泛民公費考察抓到盡
立法會議員成日批評高官同法定機構高層公費旅遊用到盡，估唔到角色掉轉，議員亦唔好得幾多。早前我哋先報道過，立法會議會聯絡小組委員聽日就會出訪北歐三國考察八日，泛民嘅何秀蘭、劉慧卿、黃碧雲（一舊雲）同資訊科技界莫乃光都提早四日出發，據講係純玩；不過，豪遊事件仲有下文，事關教育界葉建源都改咗機票，但佢就遲幾日先返香港，一個公費考察團，泛民議員「早去、晚返」用盡機票嘅「邊際價值」，嘩！呢啲公務真係太筍。
設計圖片及對白
每位花五萬元公帑
內會討論呢個考察團嘅時候，委員會當時已經披露，每個議員嘅開支預計係三萬四千元至五萬七千元之間，換言之，每人都要花四、五萬元公帑先可以去呢程，議員外訪開支由納稅人「找數」，佢哋嘅一舉一動理應小心又謹慎啫，不過，卻唔係人人咁諗，葉建源話，佢留多幾日喺赫爾辛基，只係想考察當地嘅教育政策，又會相約當地國會議員進行交流，並唔係一心去玩，覺得咁樣做一啲問題都冇喎。
早前，劉慧卿同一舊雲就話，佢哋夾到時間，咪想提前幾日過去玩囉，據知，佢哋嘅旅費獲得立法會海外職務津貼贊助，改機票都不涉額外開支，但立法會外訪團都咁樣搞，佢哋仲好唔好意思鬧爆以相同手法去威嘅高官同公職人員呢？議員律人咁嚴，律己又「冇問題」，講唔通啩？
葉建源丟低罷課日
最搞鬼嘅係，香港學生搞罷課，作為教育界嘅立法會議員葉建源卻寧願留喺北歐多幾日，同罷課期間放大假嘅教育局局長吳克儉一樣咁「盡責」，葉建源話佢一定可以趕返港參與最後幾日嘅行動，就算自己唔喺香港，都一定會透過新聞了解行動進展，唔擔心班學生會搞出事喎。
