台商跪地認錯 港官何時道歉

呢，台灣當局喺證實香港公司將飼料豬油當食油賣畀台灣公司後，宣布即時停止從香港入口豬油，另外對來自香港、大陸同澳門嘅油品，百分百逐批檢驗。你話嘞，香港油品被視為同大陸油品一樣靠唔住，係咪醜死怪吖？

講起真係諷刺，香港人成日話大陸食品質量信唔過，指內地奸商唯利是圖，為賺錢乜都做得出，點知原來係五十步笑一百步，香港一樣有人見錢眼開，手法同內地奸商差唔多咋。好似捲入呢場坑渠油風波嘅本港生產商咁，明明係飼料豬油，居然報稱係可製作人造牛油、起酥油、炒菜油等嘅食用油，而且仲有公證行嘅證明添，結果呢啲劣質油出口台灣加工後，部分又回流香港禍害市民，而有關部門一直毫不知情，問你服未。

所以話，黑心食品無疆界，中國人劣根性作怪，加上兩岸三地相關部門監管失職，把關甩漏，唔出事至奇。就講今次吖，台灣爆出坑渠油醜聞後，當地追查出數千項問題食品清單供民眾參考，但港府依家仲攞唔出一份問題食品清單，任由食肆及食品製造商自己解畫，搞到市民無所適從，無啖好食。最離譜就係，台灣廠商從香港入口劣質油最少有十三年歷史，台灣當局更證明九成劣質油來自香港，對於咁大個食品安全漏洞，港府竟然從未發覺，靠呢班反應遲鈍嘅庸官把關，簡直嘥氣。

正所謂，錯就要認，打就企定，出事嘅台灣公司負責人尋日親自舉行記者會，聲淚俱下，兩度下跪道歉，而且當眾飲油，又表示願意用盡家財作出賠償。即係咁，呢啲舉動無疑係有做騷嘅成分，但無論點都好，人哋肯公開下跪道歉，總算有交代。反觀香港，唔止至今冇人道歉，連食環署及食安中心負責人亦一度潛水，直至醜聞愈揭愈多，佢哋先至施施然出來補鑊。

計太一叮話齋，依家補鑊已經太遲咯，如果食安官僚真係有擔當，不妨學嗰位台灣公司負責人咁，飲油以證清白，佢哋夠唔夠膽吖？嗱，咪畀人睇死吖，當年爆發三聚氰胺毒奶粉風波，時任食衞局局長嘅周一嶽連一塊熊仔餅都唔敢食，依家呢班港產官僚一樣冇膽兼冇膊頭嘅咋，叮！