城中鏡：歌星名人開金口與眾同樂
歌聲造就美麗人生，一班熱愛音樂嘅城中名人以音符燃亮年輕人，早前舉辦第二屆「眾樂樂」慈善音樂會，為「樂兒計劃成長基金」籌款。當晚，紅歌星及名人輪流上台獻唱，香港專業及資深行政人員協會成員容海恩一口氣唱三首歌，中氣十足。
李煥明（右）與麥皓輪出錢出力助學生實現音樂夢。
容海恩（右）以磁性聲線高唱一曲《夢伴》。（被訪者提供）
陳李妮（左）聽得興起即場慷慨解囊，譚浩瀚送上紀念品致謝。（被訪者提供）
話明係與眾同樂，除名人表演之外，七十位曾參加音樂培訓計劃嘅學生亦有粉墨登場。基金會發起人之一嘅李煥明（Wendy），與音樂總監麥皓輪（Holun）輪流為佢哋伴奏，彈足一晚。
Holun過去幾年一直為將軍澳及天水圍兩間中學擔任義務音樂老師，透過計劃協助家境清貧嘅學生買樂器，又免費教授演奏技巧。睇見班學生脫胎換骨，不再喺街頭遊蕩，寧返校練習，Holun大感欣慰。
參加計劃嘅學生背後各有故事。有學生上台時窮得連一件「見得人」嘅衫都冇，仍自信地穿着校服上台；亦有學生因為太緊張胃抽筋唱到面容扭曲。但班名人喺台下熱烈打氣，齊齊唱足四粒鐘唔捨得走，歌星呂珊都有嚟撐場，即興唱咗首《順流逆流》助興。
陳李妮怕醜 捐款代上台
博愛醫院副主席陳李妮（Lily）為撐音樂會籌委會主席譚浩瀚，食完晚飯後來聽歌，因怕醜冇上台，但就捐出五萬元贊助他人開金口。全晚合共籌得逾四十萬元，Wendy話，明年一定再嚟，期望更多善心人士贊助表演場地。Holun就話會招攬更多中一學生加入音樂培訓，望明年培育夠一百人。
