政壇：搞搞政：老鴿乳鴿分工 免佔中一鑊熟
佔中搞手尋日宣布，佔中行動以「去飲」做暗號，仲話假日遊行完後就會「去飲」，十月一日呢個時間似已呼之欲出，由於泛民幾個政黨都要參加，為免黨領導層齊齊參加活動，或齊齊被拉，據講白鴿黨都做定應變計劃，即係老鴿去飲，乳鴿守鴿籠，所以乳鴿兼副主席羅健熙、南區區議員區諾軒等都無得「去飲」。
設計圖片及設計對白
白鴿黨喺上次政改關鍵時刻臨時轉軚，背負罵名多年，所以今次政改，佢哋表現好堅定，只不過，今年七一遊行後預演佔中，警方事後大規模拘捕逾五百名示威者，雖然最終並無起訴任何人，但警方一早揚言會採取果斷嘅策略，令唔少泛民中人認定警方一定會清場並拘捕示威者。由於警方有權扣留示威者長達四十八小時，為免黨內高層一齊去飲，白鴿黨陷入真空狀態，近日佢哋敲定，三十位中委有至少九位唔會「去飲」，避免全部一鑊熟。
有份「去飲」嘅除咗五位立法會議員外，仲包括前立法會議員張文光、黃成智、楊森及李永達等人，而「乳鴿」方面就包括鄺俊宇、柯耀林及尹兆堅等人。至於無份「去飲」嘅乳鴿仲有東區區議員趙家賢及黎敬瑋等人。一旦卿姐同副主席蔡耀昌不幸被捕，羅健熙就要喺出面統領大局，按章召開中常委會議。據聞應變措施仲建議「去飲」期間，若有人要簽發支票，可以由唔「去飲」嘅秘書長或者司庫先行簽名，再由羅健熙把關簽第二個名，保證成個黨可以繼續運作。
