政壇：圍封政總 蔡潔如有排煩
暑假前開始圍封嘅政府總部東翼公民廣場，日前終於完成工程重開，不過，打開圍板後，公民廣場嘅新形象就被指同政總「門常開」嘅設計大相逕庭，泛民成員爭相批評，白鴿黨嘅何俊仁（AV仁）都不甘人後，尋日即刻有行動，拉埋曾經喺公民廣場駐紮七個月嘅牧師Bob Kraft一齊，宣布就工程提出司法覆核，下個禮拜就有進一步行動，佢哋狙擊行政署圍鐵欄及限定使用時間，指摘當局違反喺立法會會議上作出嘅承諾，睇嚟，行政署長蔡潔如要迎接新一輪炮火嘞！
設計圖片及設計對白
挑戰工程違反承諾
公民廣場嘅工程包括外圍加設三米高嘅鐵欄，圍欄外更設約一米高嘅花槽，東翼正門又新增咗五條防撞金屬柱躉，公眾只能使用中間約一米闊嘅通道。唔單止咁，廣場使用時間亦收縮為早上六時至晚上十一時。
仲有呀，行政署另外喺廣場往夏愨道行人天橋嘅扶手電梯附近，加設三米高圍板及巨型盆栽。
Bob Kraft話，公民廣場有好多人使用，圍鐵欄影響市民，AV仁更透露，當年政府向立法會講解「門常開」工程時，都講明上址會二十四小時開放，又保證新大樓象徵政府會以開放態度貼近市民，依家，「門常開」變咗「欄常在」，所以佢哋一方面挑戰工程違反當日嘅承諾，同時亦會從人權及公民權方面着手，AV仁對案件非常有信心，仲話：「話唔定政府賠錢畀我哋添！」
行政署尋日只係透過發言人表示，政總東翼前用地屬政府物業，供政府車輛及人員落客使用，並非公眾休憩用地，又話東翼前地外嘅一段添美道已劃為公眾活動區，公眾不需事先獲當局批准，便可集會及向政府遞交請願信。至於東翼前嘅地方，指定時間仍可供市民按程序申請使用喎。其實，呢個回覆嘅意思係：請願，行出啲咪得囉！
