鐵路藍圖雖吸引 幾時落實最關鍵
香港要發展，鐵路最關鍵。港府本月底將會公布二○二○年後嘅鐵路發展藍圖，究竟有冇新意，不妨拭目以待，但首先要提醒嘅係，近年多條新鐵路支線問題多多，烏龍百出，當局最緊要做好規劃，唔好再重蹈覆轍吖。
即係咁，消息指當局即將宣布興建多條新路線，曾經進行公衆諮詢嘅十條新鐵路大部分會落實，包括南港島線（西段）、北港島線、北環線、東涌西延線及西鐵屯門南延線等，唯獨連接屯門至荃灣嘅「屯荃鐵路」由於不符成本效益，被束之高閣。本來呢，隨着市民對集體運輸工具嘅需求不斷增加，興建新鐵路係大勢所趨，問題係，如果咁多條鐵路同時開工，隨時又搞到一鑊泡，當局點樣確保唔會出事呢？係人都知，近年港鐵負責興建嘅多條新支線醜聞多多，唔係工程延誤，就係嚴重超支，市民唔擔心就假。
當局見過鬼怕黑，呢次聽講會分散各條新鐵路支線嘅動工時間，以免消化不良咁話。嗱，吃一塹，長一智，能夠吸取教訓當然最好，最怕港鐵死性不改，港府監管又甩甩漏漏，到頭嚟又係事與願違，咁就弄巧反拙喇。
話時話，家陣港鐵興建緊嘅五條新支線全部延誤，合共超支幾百億元，納稅人怨聲載道不特止，更令香港成為國際笑柄。呢，連前港鐵工程總監亦忍唔住指摘港府錯將多條鐵路工程同時動工，結果唔止扯高建築成本，更因為人手短缺而導致工程延誤。
其實，香港交通愈來愈擠塞，早就應該落實新鐵路喇。大家有眼睇，家陣一到繁忙時間，港鐵車廂就好似沙甸魚咁，直情係人疊人，尤其係過海線路更加逼爆，經常要等幾班車至上得到，可見興建新鐵路嘅迫切性已經刻不容緩。就以北港島線為例，前後已經講咗幾年，市民都認為有實際需要，應該早啲落實，弊在當局慢條斯理，一拖再拖，問你服未。今時今日，內地高鐵發展一日千里，四通八達，香港本來已經嚴重落後，依家仲要拖拖拉拉，蹉跎歲月，想唔邊緣化都幾難！
無論點都好，鐵路發展停步不前，對香港百害而無一利，當局吸取教訓，分開動工時間係應有之義，但講到底，最緊要係做好規劃，唔好閉門造車，否則，萬一再爆出延誤及超支醜聞，唔止港鐵要孭鑊，港府亦走唔甩吖，叮！
