SUN搞作：打橫嚟講：油浸台灣，香港人無路走

身邊有不少嘅朋友，眼見香港沉淪，烏煙瘴氣，陌生得心痛至死，以無眼屎乾淨盲的心態，移民速閃。遠的，走去英美法澳；近的，愛選同聲同氣的台灣寶島。

真的，去年，計劃遷移往台灣的好朋友，無五十都有兩三打，大多數揀台東和台南，貪嗰度清靜樸素，有人情味。

有位老友還準備買地起樓自住添，更有人在山林區投資民宿，遠離蝗國腳下這片充滿反智惡臭的鬼域特區！

哼！本來展開人生下一頁新生命的美夢，終於又來一嘢危機挑戰嘞！一桶桶的「坑渠餿水黑心油」，兜頭兜腦淋落嚟！唔止令要移民台灣的香港人打個突，台灣本土人更是手足無措，無法應對！

台灣衞生福利部食品藥物署說他們對食品的稽查，只針對生產地點的衞生環境和製作程序而已！所以，上述的餿水油全獲認定符合食品良好衞生規範喎！咁都得？只睇裝修靚唔靚，而不查驗物料安全成分？設計呢個制度的高人，可來香港做大官矣！

香港食安中心日日口口聲聲話台灣的坑渠油無「輸入」來香港，哈哈……尋日，香港政府證實台灣的「香豬油」原材料，係由香港運去台灣的！死未！

夢寐以求的「世外桃源」，咫尺咁近，卻又遠不可攀。平日，有空隨時飛去兜個圈，掃吓小食的雅興，也被褫奪了！

香港人，你哋還是乖乖留守呢度，有坑渠油畀你飲住先，仲想點？唔想要？到你話事咩？請看看，要台灣即死，話都無咁易呀！收到未？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府