少膽虫我自認係貪吃之徒,喺壹全霉入面除咗淫賤黎,我諗只有肥豪可以跟貼我,就睇佢下午茶都要食四個月餅,你就知佢咩啦!講開又講,中秋過後,又踏入炒蝦拆蟹嘅大好日子,適逢內地官場吹倡廉風,當然可能只係吹水啦,不過畀貪官食到貴晒嘅大閘蟹果然跌價,肅貪都算有啲貢獻。本虫對壹全霉可謂冇功都有勞,呢鋪點都要屈番淫賤黎一餐蟹宴先得!

「腦細腦細,幾時請班員工歎番餐蟹宴?我同你講呀,冇大閘蟹食,包你份《爛果》聽日出唔到街!」為咗食蟹,我都估唔到自己去得咁盡,點知淫賤黎聽完只係長嘆一聲,我即刻加多兩錢肉緊:「淫賤黎,你咪喺度扮晒蟹!平時啲乜乜物物捐款就咁大手筆,依家叫你請食蟹就咿咿哦哦,即係點先!」

淫賤黎沉默良久,終於回話:「《爛果》出唔到街有乜大不了?都冇人買o架啦!你哋想食蟹?我咪係大閘蟹囉!銷量屢創新低,股價半死不活,依家仲畀人左查右查,壹全霉同我就好似蟹咁,已經係未死先腐嘅臭蟹啦……」但見淫賤黎蟹蟹聲鞋口鞋面,我都唔忍心再叫佢請客,就留番佢自己喺房繼續發臭啦。

第一手消息請下載on.cc東網iPhone/iPad/Android/Windows Phone Apps