全國人大常委會上月底就特首普選定下框架，唔少建制派中人都急急叫泛民主派以至社會各界「袋住先」，其中唔少人都係行政會議非官守議員。

設計圖片及對白

港大民意研究計劃喺上月底向市民提問，喺未經提示下講最多五名行會成員，最多人識嘅係立法會議員葉劉淑儀，之後依次序係羅范椒芬、李慧琼、林煥光同工聯會鄭耀棠。之後再喺八月二十八日至九月三日，即係人大常委會公布普選框架前後，叫市民對呢幾位成員評分，WK獲五十二點八分，比三個月前升兩分，係幾人之中唯一分數上升嘅成員。不過，鄭耀棠就下跌一點六分至四十點七分，喺頭五位屬包尾。

鄭耀棠唔單止包尾，評分仲係跌至○三年七一以來嘅新低。睇番之前佢話泛民請中央食檸檬，食得多會胃酸過多，更講過提名委員會界別分組「可以改動只係呃人」，雖然呢個講法或者係事實，但講到出口就自然火上加油，搞到市民慶合合，真係「笨人出口」！相對似乎冇出聲撐過政府嘅林煥光，「潛水」多時，姑勿論佢係咪支持人大決定，起碼唔做唔錯就自然加分，唔通真係「悶聲發大財」？但佢身為召集人咁錫身，仲有乜作用呢？至於其餘成員，就以羅范椒芬跌得最厲害，跌咗五點六分，葉劉同李慧琼分別都跌四點二分及三點三分，全部跌至上任以來嘅新低。

羅太早前話政府好細微嘅事都要經立法會撥款通過，仲話係「拖住政府後腿」，希望特首普選後「畀多啲空間行政機構」，唔知呢番言論係咪拖低佢民望嘅原因呢？至於葉劉同李慧琼，人大公布當日就即刻企出嚟撐場，又係咪失分嘅原因呢？

第一手消息請下載on.cc東網iPhone/iPad/Android/Windows Phone Apps