政壇：滬港通講座三場全爆滿
上個禮拜提過港交所同證監會旗下投資者教育中心會合辦滬港通免費講座，畀公眾人士報名參加。估唔到，股民反應超出理想，三場講座已火速爆滿，簡直同演唱會撲飛有得揮！睇個勢，主辦機構之一嘅港交所行政總裁李小加都要諗吓，可能要加推先至可以滿足到散戶需求。從呢個指標睇，滬港通熱潮實在銳不可當，股民個個諗住有大茶飯食！
滬港通三場免費講座都爆晒，睇嚟李小加要考慮再加場嘞！（資料圖片）
港交所同投資者教育中心原定今個月二十二號喺港交所展覽館搞一場免費講座，點知反應好得咁交關，已迅速加多兩場，分別喺十月八日同二十五日。二十五號嗰場仲移師九龍塘生產力大樓，方便九龍區啲股民。結果，一樣係全院滿座。
港交所就話支持舉行滬港通講座，會視乎反應，考慮係咪再加場。講座可以喺滬港通推出之前做，亦可以喺開咗之後繼續做。
聽聞，港交所之前已同好多經紀行搞咗多場滬港通講座，畀佢哋啲客參加，當中有大牌子經紀行，亦有中小型券商，反應都不俗。市場人士話，有咁多散戶有興趣滬港通講座，一啲都唔出奇，因為香港人從來都唔蝕底，「有得炒，梗埋位；就算冇得炒，都學吓嘢，不要執輸！」依家市場普遍預期滬港通開波後，大戶北向交易（買賣A股）需求會好勁，散戶就主要係「睇風」，睇吓可否搭順風車，執番一轉！
