政壇：鄧家彪為乖女再遊斯里蘭卡
下個月初立法會就會復會，一眾議員終於要修心養性開始工作。議員Bill鄧家彪喺休會期間都有同家人去旅行，但地點唔係歐美等熱門旅遊勝地，反而係舊年已經去過嘅斯里蘭卡。阿Bill舊年暑假同老婆囡囡一心去斯里蘭卡旅遊兼賞鯨，但因為賞鯨季節在冬天，所以同鯨魚緣慳一面。不過，今年佢哋暑假出發依然睇唔到鯨魚，為乜要去多次呢？
鄧家彪明知睇唔到鯨魚，今年依然揀暑假去斯里蘭卡。（受訪者提供）
阿Bill話本身都唔係好想再去斯里蘭卡，但五歲大嘅囡囡一聽到去旅行就話要去斯里蘭卡，又話要睇番去年錯過咗嘅鯨魚喎。雖然心知去到一樣睇唔到鯨魚，但喺囡囡苦苦哀求之下，加上佢兩公婆去邊度都無所謂，於是一行三人又再去多次斯里蘭卡。
結果今次十幾日嘅行程，一條鯨魚都見唔到，淨係見到舊年夏天已經睇過嘅海龜。
不過，一向樂天嘅阿Bill仍然話無所謂，事關斯里蘭卡風景優美之餘天氣又好，加上遊人唔多，作為度假地方算係唔錯喎。
