設計圖片
依家立法會放暑假已接近尾聲，多個事務委員會嘅外訪計劃正排緊隊出發，好似議會聯絡小組委員會將於下周一外訪北歐芬蘭、挪威、丹麥三國八日，一眾議員吸取去年接受航空公司款待免費遊法國嘅「經驗」，都唔敢亂嚟。
不過，泛民議員「一舊雲」黃碧雲、何秀蘭、劉慧卿同資訊科技界嘅Charles莫乃光竟然見過鬼都仲唔怕黑，改機票提早四日出發去赫爾辛基，仲明目張膽承認四日行程百分百「純玩」喎！
矢口否認提早「外訪」
據知四人自組北歐「純玩團」均獲立法會海外職務訪問津貼資助，加上唔使錢改機票，所以四日行程唯一額外開支就係酒店房租，名副其實係攞正牌用公帑順便去遊山玩水。四人喺政改敏感時刻無端端提早四日歐遊，難免再招人話柄，莫非又係勾結外國勢力？
我哋問過一舊雲，佢話提早出發純粹想早啲過去玩吓，絕冇任何官式或非官式訪問，仲透露對北歐設計好有興趣，要到當地好好「考察」吓。委員會主席劉慧卿亦矢口否認提早「外訪」，解釋大家只係咁啱傾開，見夾到時間先一齊提早出發過去玩吓喎。被問到點解唔叫多啲議員加入「純玩團」？卿姐哈哈大笑話：「你估個個都咁得閒咩！」係囉，點解你哋又咁得閒去玩嘅？
議員今次外訪去到北歐咁遠，據知係趁香港政改時刻，考察北歐國家點樣組織多黨派聯合政府，各方又點樣求同存異。
不過，政改框架早已一錘定音，照搬外國一套到香港只會「水土不服」，呢次外訪睇怕都係「玩嘅成分居多」，考察番嚟嘅嘢肯定用唔着。
第一手消息請下載on.cc東網
