慶節拒玩螢光棒 綠色中秋人人讚
但願人長久，千里共嬋娟，中秋佳節係一家大細共享天倫樂嘅良機，點可以錯過吖，不過有班人嘅「慶祝」方法比較特別，就係拉大隊去維園扭耳仔懺悔嘞！
係咁嘅，近年中秋節咪好興玩螢光棒嘅，有環保團體認為螢光棒污染環境，兼夾難以回收，於是喺網上發動大家去維園收集螢光棒，同埋集體扭耳仔懺悔，承諾以後唔玩，佢哋仲向「冰桶挑戰」偷師，呼籲網民上載扭耳仔相後tag其他人參加添。
老實講，螢光棒造型千變萬化，的確幾盞鬼嘅，之但係人類就玩得過癮咯，地球先生認真多得你哋唔少。要知道，螢光棒係用無法分解嘅化學物質做嘅，非常之唔環保。有團體早前做過調查，發現受訪家庭舊年平均拋棄四十二支螢光棒，以全港二百四十萬戶計算，即係一年有超過一億支螢光棒直接進入堆填區。照咁睇，玩螢光棒同集體謀殺地球先生冇乜分別，唔單止要扭耳仔，直頭要打屁股啦，吓話！
仲有吖，螢光棒除咗係地球殺手，本身亦都係一件「大殺傷力武器」添！唔講唔知，原來近年中秋過後都有市民因為不慎拗斷螢光棒，畀裏面嘅螢光劑灼傷眼睛而要入院。有專家更加指出，人體吸入螢光劑可導致呼吸系統受損，唔小心入眼可能造成永久視力損害，小朋友如果吞落肚更加會灼傷食道、肝同腎等器官，唔係講玩o架。
提起螢光棒，最常見梗係喺演唱會搞氣氛啦，貪佢全場萬點螢光大合唱夠晒氣勢吖嘛，但其實近年唔少歌手提倡環保，勸歌迷棄用螢光棒，改為喺手機下載app營造同樣效果，又或者用LED燈代替，所以話啫，今時今日再玩螢光棒，真係out到冇朋友o架。
總而言之，要過綠色中秋，方法有好多，好似燈籠咁吖，無論係傳統紙製燈籠抑或電池膠燈籠都好，只要好好保存，其實可以用好多年，而網上亦有好多燈籠DIY嘅資料，大家不妨參考吓。至於月餅咯喎，多出嚟嘅可以送畀慈善團體，幫助有需要嘅人。環保、慳錢、行善，一次過滿足晒三個願望，就係咁簡單。
計太一叮話齋，中秋佳節都係回歸傳統好啲。試諗吓，父母同仔女一邊食月餅，一邊講解明太祖朱元璋當年點樣將起義反抗蒙古人嘅紙條，塞入月餅嘅典故，就已經係一堂親子歷史課啦，你哋話係咪？
