全國人大常委會上星期日公布特首框架嘅決定，人大常委會副秘書長李飛翌日來港出席政改簡介會，向社會各界解釋中央決定。一眾泛民主派立法會議員去亞洲博覽館示威，抗議方案有違國際標準，當中唯獨唔見咗資訊科技界Charles莫乃光。喺呢個關鍵時刻突然唔見影，莫非佢覺得政改唔係咁重要？

莫乃光去土耳其開會，忙裏偷閒去聖索菲亞大教堂參觀。（受訪者提供）

莫乃光（受訪者提供）

Charles話喺政改公布當晚搭飛機去土耳其伊斯坦布爾，參加聯合國喺當地舉行嘅「互聯網管治論壇」，同世界各地嘅資訊科技界精英開會討論網絡安全問題。佢話當地嘅會議議程非常緊湊，連日由朝開到晚不特止，仲要主持一個關於互聯網用戶權利嘅工作坊，連同多年無見嘅業界朋友傾多兩句都無時間。

難得去到土耳其，佢都有忙裏偷閒去參觀吓當地嘅歷史名勝，包括有近一千五百年歷史嘅聖索菲亞大教堂同新清真寺。不過，佢就略嫌當地美食過於單一，日日都要食烤肉串，搞到連佢呢啲對飲食無乜要求嘅人都話有啲悶喎。

第一手消息請下載on.cc東網iPhone/iPad/Android/Windows Phone Apps