城中鏡：輪后喜事多股壇「丁」財兩旺
近期輪場多喜臨門！港股氣氛轉旺，輪場生意多咗唔在講，最開心嘅係，今年多位「輪后」相繼有喜，可喜可賀呀！
郭小菱有個兩歲大嘅「小龍女」，嚟緊仲會添個囡囡。
朱紅話近排仲未戒口，照食壽司等生冷嘢。
六月升呢做靚媽嘅蔡秀虹，繼續放產假陪住BB。
中銀國際股票衍生產品董事Niki朱紅好高興咁話已懷有第二胎，預產期係明年三月。明年係羊年，唔知會係「羊仔」定係「羊女」呢？咁依家兩歲半嘅大女以後就多個伴嘞，認真樂也融融。
唔知係咪有晒經驗，Niki好坦白話近排仲未戒口，照食壽司等生冷嘢，真係畀佢激親。而佢同天下父母一樣，同樣話生仔定生女都冇所謂，最緊要BB健健康康、開開心心，並期望可延續上次嘅美好經驗：餵BB一年人奶。
另一位要恭喜嘅，係有咗七個月嘅法巴上市衍生產品部執行董事Shirley郭小菱。Shirley一家除咗兩歲大嘅「小龍女」、愛犬Cotton仔仔，嚟緊十一月底更會添個「馬女」，一家五口想必非常熱鬧。仲記得Shirley上次BB足五個禮拜就即刻訂定醫院床位，今次佢就淡定得多，畢竟有經驗，仲笑話啲BB衫可以重用添！
至於剛喺六月升呢做靚媽嘅法興環球股票產品部副總裁Eva蔡秀虹，就繼續放緊產假陪住BB。見佢最新喺個人facebook上載多張仔仔靚相，好得意好幸福啊！
