城中鏡：坑渠油肆虐 台灣幫谷氣
近日台灣驚爆無良商人使用坑渠油混入食油風波，牽涉嘅食品、食肆愈揭愈多，遍布港澳台，包括港人至愛嘅手信小食鳳梨酥。早前港澳台灣慈善基金會（下稱基金會）舉辦聯歡午宴，一眾台灣幫齊現身與逾千名長者賀中秋。基金會副主席Louisa羅台秦話聽到消息後覺得好冇面，事關佢一向以台灣人文明善良為榮，點知出現咗啲咁無良嘅商人。台灣同鄉會前會長賴李承美就直言冇得驚，惟有食嘢適可而止，並注意身體嘅新陳代謝，令毒素冇得留低。
嚴重光（左二）形容長者宴場面好似「千叟宴」咁墟冚，大讚林添茂（右一）、羅台秦（右二）及何玉美（左一）有愛心。
賴李承美（右）同女兒賴明潔（左）都話黑心食品問題冇得驚。中為長者宴籌委會主席王茂林。
李嘉音（右）慨嘆黑心食品停不了，巫宗霖（左）希望事件無損港人到台灣旅遊嘅信心。
賴太話不時採購家鄉水果同美食送禮自用，好似適逢中秋，佢就訂咗一箱箱台南文旦柚同愛文芒果乾。近期台灣不時爆發黑心食品事件，雖然令人激氣，但就冇影響佢嘅食欲。
基金會主席何玉美都話，過往台灣好少發生黑心食品事件，相信今次只係個別事件，事關台灣人一向好注重食品安全及衞生，喺全民監督之下，奸商肯定冇容身之處喎。Louisa笑笑口話贊成，所以佢呢頭激氣完，轉頭就食咗塊鳳梨酥。
「面對問題 解決問題」
台灣觀光局駐港辦事處主任巫宗霖就話嚟緊會喺香港舉行兩場旅遊推廣活動，咁啱爆發坑渠油事件，恐怕令港人信心打折扣，但台灣將採取「面對問題、解決問題」嘅態度，希望長遠為遊客提供優質旅遊環境。
講番今次長者聯歡午宴，出席嘅仲有台北經濟文化辦事處處長嚴重光、基金會創會主席林添茂同副主席李嘉音等。嚴重光對台灣僑界嘅愛心同感驕傲，仲話見到一千二百名長者逼爆會場，好似重現清朝康熙及乾隆皇帝時期嘅耆老御宴「千叟宴」盛況，非常墟冚。
