白鴿黨喺上屆立法會新界西地區直選嘅部署失當,太貪心同時派出「老鴿」夫妻檔、「高達」李永達同嚟自屯門嘅阿Tree陳樹英上陣。其後見形勢不妙,兩人又拒絕「棄保」,最終雙雙落選,令白鴿黨歷來首次缺席新西。

設計圖片及對白

下屆選舉好快又殺到,高達早已表明唔再參選,全力支持多次同立會擦身而過嘅太太。阿Tree亦相當勤力,遊行示威幾乎次次都有佢份。至於由街工出身、嚟自荃灣嘅「中鴿」尹兆堅,雖然曾自爆有過婚外情,但仍深得黨內大佬歡心,佢嘅地區工作亦做得唔錯。問題係兩人形象好聽啲就係實幹,唔好聽就係欠缺魅力同年輕人票源,兩人同區一齊參選,隨時會重蹈上屆選舉嘅覆轍。

鄺俊宇靠愛情小說吸票源

屬於後起之秀、嚟自元朗嘅「乳鴿」鄺俊宇,講激講勤力都唔夠黨內兩位前輩,但係佢喺網絡發表嘅愛情小說,就成功吸引到一班後生仔女支持,最近仲一年內連出兩本書,銷量尚算唔錯。所以黨內就有人建議由鄺俊宇,取代阿Tree或尹兆堅其中一人參選,認為可幫到個黨開拓新票源,抗衡以年輕支持者為主嘅激進泛民對手。

白鴿黨內亦有人指出,既然鄺俊宇嘅支持者來自全港各區,理應接替將會退休嘅「AV仁」何俊仁,轉戰全港性嘅超級區會。不過眾所周知,角逐超級議席有好多變數,包括自己能否喺明年區議會選舉連任,以及同屬泛民陣營嘅公文袋會唔會同派乜人參選。如果公文袋派出有分量嘅人參選超級,白鴿黨就好難保住現有兩個超級議席,即新參選人同現任嘅涂謹申肯定會求其死一件。

由於選超級變數較多,勝算不穩,阿Tree、尹兆堅同鄺俊宇暫時都唔肯轉區,令該黨相當頭痕,擔心內部遲早會惡戰連場。

第一手消息請下載on.cc東網iPhone/iPad/Android/Windows Phone Apps