政壇：夏千福整月餅暗示起義？
外部勢力接二連三對香港政改問題說三道四，中國外交部多次出聲促請各國停止干涉香港事務同中國內政。外交部駐港特派員宋哲日前更借中秋為名，喺公署大樓高調宴請七十多名駐港領事館人員，介紹全國人大常委會決定嘅法律效力，最鍾意「搞搞震」嘅美國駐港總領事夏千福都係座上客。不過事隔數日，夏千福又揀正中秋節正日攪局，喺社交網站上載多張到聖雅各福群會學整有機月餅同贈予灣仔長者嘅相片。莫非夏千福欲借整月餅，暗示美國即將喺香港策動起義？
夏千福又揀正中秋節正日攪局，於社交網站上載多張學整有機月餅嘅相片。（互聯網圖片）
對於夏千福高調整餅，網民反應不一，有支持嘅網民稱呼夏千福為「夏督」，力撐佢做港督。亦有網民邀請夏千福「歡迎快點來干預香港內政及普選」，又話相信美國佬整嘅月餅，肯定畀中港台澳嘅月餅更為安全衞生。
不過亦有網民寸夏千福，質疑佢唔清楚月餅當初係用作起義。究竟夏千福對月餅嘅政治含義，係真唔知定扮無知，只有佢自己先知道嘞！
