政壇：譚凱邦暗寸「水炮演習」浪費

話說華人民主書院前日喺屯門大欖涌進行水炮訓練，模擬警方一旦喺佔中期間動用水炮車清場，示威者應該點樣應對，多個泛民主派政黨嘅人士參與，當中亦包括多名白鴿黨嘅立法會議員同黨員。

譚凱邦

譚凱邦喺社交網站將「水炮演習」形容做「射水槍」。

同白鴿黨一向唔多妥嘅新民主同盟成員Roy譚凱邦就喺社交網站貼文，將「水炮演習」形容做「射水槍」，又叫網民自行想像有關活動係咪浪費食水，相當寸嘴。

其實，身兼環保觸覺發言人嘅阿Roy，早前都有公開批評過「冰桶挑戰」活動，今次佢淨係叫網民諗吓有關活動係咪嘥水，已經算係畀足面泛民，未必係同白鴿黨與新民主同盟嘅仇怨有關嘅。