「冰桶挑戰」熱潮逐漸退減，至今已為香港肌健協會籌得愈二千萬元善款，但做善事永遠冇人嫌多或嫌遲。立法會議員鍾樹根尋日就追水尾，聯同港超聯球星夏志明、「女拳霸」謝蘊昭同演員馮寶寶一齊淋冰水。呢四位善長聽落風牛馬不相及，唔知有咩關係呢？

夏志明（左起）、謝蘊昭同鍾樹根齊齊淋冰水。

謝蘊昭（中）自言脂肪少唔係好捱得凍，左為鍾樹根，右為夏志明。

一行人尋日雲集炮台山一間酒吧門外淋冰水，原來佢哋幾個都咁啱係呢間酒吧嘅常客，經常收工就過去打躉。有次酒吧老闆夏社強問起佢哋有冇玩過淋冰水，講吓講吓就決定一齊組隊接受挑戰。

不過夏社強尋日臨時縮沙，搵咗仔仔夏志明代父上陣。馮寶寶就因為上周啱啱病咗入過醫院，樹根驚佢唔捱得凍，最後勸服佢放棄。

樹根直言等咗淋冰水呢個機會好耐，可惜遲遲冇人點名挑戰佢，會聯同辦事處職員夾份捐出約二千港元畀香港肌健協會，其中佢自己出一千。

謝蘊昭就話佢哋打開拳嘅身體當然強壯，但同時好少脂肪，唔係好捱得凍，但為咗做善事都冇計喇！

第一手消息請下載on.cc東網iPhone/iPad/Android/Windows Phone Apps