政壇：政總重開貫徹門常關
對於佔中，政府係咪心驚膽怯，從好多地方可以睇得出。好似由蔡潔如做署長嘅行政署喺七月宣布政府總部東翼對開空地（俗稱公民廣場），無啦啦話暑假期間因為工程而要封閉，擺到明係驚佔中重演反國教一役，日日佔領個政府廣場。本來上個月應該完成工程，但點知政府又話「天氣」影響工程進度，要推遲至今個月十號至重開廣場，最近佔中疑似押後至十月一號先爆發，正當大家懷疑政府係咪會再度延遲工程完工時間，政府尋日決定醜婦終須見家翁，定於十號重開公民廣場，但就打算玩「宵禁」，唔畀人喺公民廣場過夜留守。
設計圖片及對白
政總東翼前空地加設永久性圍欄後，明日將會重新開放。
近年唔少大型集會或者抗爭行動，都喺公民廣場舉行。政府早前為提升保安級別，特意進行維修工程。我哋最近去過視察，發現廣場四周設置三米高鐵欄，部分鐵欄上面仲裝置三百六十度全方位的閉路電視作監察。
行政署早前推遲公民廣場完工日期，都係想佔中另覓地方，唔好揀公民廣場。點知佔中遲遲未開波，搞到政府焗住要開放廣場，尋日行政署公布廣場喺本月十號重開，但政府仍然貫徹「門常關」態度，對公民廣場實施諸多限制。
集會只限周日公眾假期
首先廣場只限來往政府總部或立法會嘅訪客經過，即係話普通市民如果想行去公民廣場影張相都未必得。第二，廣場每晚十一點至翌日早上六點會封閉，一般人士唔可以逗留，除非有立法會證件同記者證。至於點解要「宵禁」，當然係無解釋啦。
既然每日有七小時宵禁，咁係咪其餘時間可以入去靜坐集會呢？又未必喎，因為行政署話公眾人士申請集會只限周日同公眾假期，時間仲限死喺早上十點至晚上六點半。換言之，即係唔可以過夜留守政總。連留守咁和平都唔得，試問抗爭行動又點會唔升級呢？
