「飛排」知多啲：頂價近頸位一隻豬唔夠一斤
【本報訊】豬肉不同部位價格不同、烹調方式亦不同，其中「飛排」位於豬頸附近。有豬肉業內人士指出，「飛排」屬頂價部位，每斤售價超過五十元，較一般排骨貴四至五元，由於每隻豬一般只有一塊重量不足一斤的「飛排」肉，故十分矜貴搶手，加上肉質較腍、肉味香滑，深受家庭主婦歡迎，通常需預早訂貨。
激射黃綠色膿液的「飛排」購自大埔新達廣場百佳超市內的肉檔。
肉質腍滑 蒸炆一流
食豬原來也大有學問，一隻豬可以烹調出多款菜式，但需選用合適的豬隻部位。香港豬肉總商會理事長許偉堅指，位於豬頸附近的「飛排」、脊骨與大排骨相連的「柳梅」及豬手或後腿內的豬（月展）均屬貴價部位。其中「飛排」的部位細小，故價格稍高，又稱「飛機排」，「可能係飛排貼住唐排（肩胛排），切割刀法要飛出嚟所以叫飛排」。
「飛排」肉質較腍，許偉堅指適合蒸或炆，可以用作梅子蒸飛排，亦可作煎豬排，口感十分腍滑。由於分量不多，一般家庭主婦需預早訂貨，「一個豬肉檔一日賣五、六隻豬先得幾舊，搶手起上嚟要早兩日訂先有」。
