「嘍Hi裙」呢個潮語，係有季節性，因為「嘍Hi裙」嘅意思其實即係女士喺夏天成日着嘅短裙。夏日炎炎，好多女士都喜歡穿短裙，展露一雙玉腿，加上一雙高跟鞋，行起路嚟婀娜多姿，自己涼快，男士眼睛更涼快。咁好好地一襲短裙，點解又叫做「嘍Hi裙」？「嘍Hi」其實即係「性挑逗」咁嘅意思，「嘍」即係邀請嘅廣東話俗語，「Hi」係討論區專屬詞，即係搞嘢，男女間之性事。一啲網上討論區嘅網民，覺得一啲女仔着到條裙咁短，擺明係挑逗男性，「嘍Hi」想上床，所以形容嗰一類裙叫做「嘍Hi裙」。

城中二三線歌手爆出打老婆醜聞，原因又係因為老掉了牙嘅小三，導致婚姻破裂。本來呢位歌手已經淪為暗星，佢老婆雖然都係拍過電影做過藝人，但係名氣唔算太大。早年佢兩公婆仲上過CCTVB啲咩愛情綜合節目，晒過恩愛，佢兩夫婦更育有兩位小朋友，雖然唔係大明星，但呢個薄有名氣嘅家庭，喺別人眼中，都尚算OK幸福。點知一個名不見經傳嘅小三，一吓橫刀就將一個大好家庭劈散。歌手同小三嘅淫照仲喺網上流傳，大婆見到之後聲稱腳軟，憤而離婚。廣大市民同網民，將本來只屬於一家人嘅事，變成公然審判嘅案例。我最痛心都係兩個小朋友，以後又要喺一個破碎家庭成長。小三會否同歌手雙宿雙棲就未知，不過小三嘅破壞力，真係可大可小。好似啲大陸貪官淫官，好多時都因為啲小三小四而身敗名裂，一夜間烏紗不保。自古英雄難過美人關，何況係狗熊？不過遇上啲「準」小三，日日着住啲「嘍Hi裙」，性感挑逗，真係要有番咁上下定力先頂得住！

不過，着「嘍Hi裙」都要講資格，喺街上見得最多嘅都係一啲粗肥醜嘅女士，就算着起「嘍Hi裙」都不會挑起性趣。呢啲情形只能用一句古老粵語形容：「豬乸戴耳環！」

第一手消息請下載on.cc東網iPhone/iPad/Android/Windows Phone Apps