政壇：史美倫好實際畀學費要上堂

學聯正密謀發動罷課，抗議全國人大常委會就政改定下嘅框架，有院校仲揚言發動罷工、罷市，愈搞愈激。不過，曾任大學教育資助委員會主席嘅行政會議成員史美倫就對罷課不敢苟同，仲自爆七十年代留學美國期間都遇過當地學生罷課，但佢自言為人好實際，堅決返學唔走堂。

史美倫當年留學美國堅拒參與罷課反越戰。

史美倫認為學生有「激情」係可以理解，又透露七十年代留學美國期間，身邊好多同學都因為越戰而痛失至親，後來部分學生發動罷課，要求美方結束戰事。不過，佢自言當年作為海外留學生，好實際咁認為畀咗學費梗係要上堂啦，所以堅持唔參與罷課，仲話美國政府唔會因為學生罷課而實施唔同嘅政策。

講起政改，身兼港區全國人大代表嘅史美倫上個月都有列席全國人大常委會會議，佢坦言人大嘅政改框架的確有優化空間，但目前唔係追究責任嘅時候，最緊要係「向前走」，相反原地踏步只會令香港未來更加難管治喎。