政壇：傑出專業女性分享成功之道

代理Leonidas朱古力嘅Viola黃何淑英係得獎人之一，為紀念患有唐氏綜合症去世的獨子，佢十年前創立兒童中心，輔導有語言障礙嘅小孩，仲將朱古力店嘅收入，全數捐贈中心作營運費。

經歷喪子之痛，Viola未有怨天尤人，反而同丈夫黃家寧投身社企，幫助有口難言嘅小朋友重過新生活，見盡唔少孩子成功克服語言障礙，同家人抱頭痛哭嘅溫馨場面，Viola都話好欣慰。佢分享成功之道話：「做事千祈唔好計較，多啲設身處地體諒別人。」

得獎名單上，仲有利豐發展（中國）董事兼集團華東首席代表Susanna趙麗娟，佢單身多年，爸媽催婚無數次，可惜催到口水乾，近年唔催嘞。佢坦言已將自己嫁給了事業，唔會扮蠢來吸引異性：「唉，緣分未到，就算放我喺一堆單身男人入面都無用。」

懂孝道情義必成功

籌委會主席麥瑞琼都係傑出女性典範，佢話父母從小教導八字真言，就係「尊師重道，孝順父母」。佢話如果一個人懂得孝道同情義，不論做人做事都一定成功。會長管胡金愛就話成功女人背後除咗有好丈夫，唔少得一個好奶奶同一個好外傭，有佢哋做後盾，女人先可以放心拚搏喎！