兩岸奸商一般黑 寶島驚現坑渠油

呢嗱，令人聞之色變嘅坑渠油，唔係大陸嘅專利，台灣亦不甘後人o架。屏東當局日前破獲一個地下工場，涉嫌非法回收俗稱坑渠油嘅餿水油、皮革廠廢棄皮脂油及屠宰場嘅皮肉下腳料，經過加工後轉賣畀廠商，分別製成食用油及豬飼料，甚至用來製月餅及鳳梨酥，估計已有近八百噸坑渠油流入市面，睇怕已經被消費者食晒落肚咯，真係諗起都核突。

最得人驚嘅係，涉案廠商唔係普通山寨工場，而係台灣嘅「豬油大戶」，有齊安全品質管理證書，證明台灣當局對食品安全嘅監管同大陸一樣咁兒戲。係人都知，大陸社會道德淪喪，奸商唯利是圖，黑心食品五花八門，坑渠油、三聚氰胺奶粉、瘦肉精豬、毒米毒菜等等，只有諗唔到，沒有做唔到。原來台灣亦好唔得去邊，黑心食品一樣層出不窮，兩岸只係五十步笑一百步咋。

就以三年前嘅塑化劑風波嚟講吖，台灣無良商家為謀取暴利，用致癌嘅塑化劑加工食品，成為台灣版嘅三聚氰胺事件，據講塑化劑嘅毒性比三聚氰胺強二十倍添，搞到人心惶惶。經過嗰次事件後，好多人以為台灣當局會吸取教訓，加強監管喇，點知事實啱啱相反，台灣當局對食品安全嘅監管一樣甩甩漏漏，結果好快又爆發毒澱粉事件，芋圓、豆花、酥炸雞排等台灣地道小食幾乎無一幸免，問你怕未。

所以話，天下烏鴉一般黑，兩岸食品一樣毒。兩岸同胞食不安心，除咗因為主管部門監管失職，更深層次原因係中國人嘅劣根性作怪。大家試諗吓，世界上有邊個民族好似中華民族咁，唯利是圖，見錢眼開，經常以黑心食品自相殘殺吖？唔怪得有人話，中華民族遲早絕子絕孫，亡國滅種，唔係危言聳聽o架。

講開又講，城門失火，殃及池魚。兩岸黑心食品氾濫成災，香港都幾難獨善其身，尤其係港產官僚把關不力，後知後覺，更加令人冇信心。你知喇，好多香港人對台灣小食情有獨鍾，冇人敢擔保今次坑渠油事件唔會波及香港。太一叮都係嗰句，兩岸三地無論實行乜嘢政治制度，見利忘義嘅民族劣根性一日唔改，黑心食品一日無法杜絕，消費者就一日無法食得安心，叮！