SUN搞作：打橫嚟講：貨真價實的「出山」

唔知報紙的高層無知，定係有心玩嘢？因為中文之「出山」，除有「隱士復出」的意思外，也可解作「出殯」！真大吉利是佢也！

董生「出山」，係以國家領導人身份出來放話，撐中央政改落三閘，高度讚揚咁做乃係「實質的民主，貨真價實的民主」啫！無乜嘢嘅！連隻腳為咗香港民主，都忘記咗「因痛落台」的前科了！

唔見幾年，老董在台上的風采依然，台型愚鈍無變也！照舊要讀寫定的稿，同樣論盡過人，齮齮齕齕、窒口窒舌，簡直同「舊時（音史）」無分別。

好老實，我睇足全場，完全唔知佢講乜，幸好翌日有報紙登錄佢老人家講稿；在此建議，為免佢老人家辛苦，又唔嘥記者和觀眾的時間，佢叫公關派文字稿就算罷啦！咪浪費大氣電波！

話說回來，董先生「龜隱」九年，香港真的國泰民安呀！起碼禽流感再無肆虐，我哋唔使洗手洗手先啦！如今，又見佢「出山」，個心點會唔離一離吖？好驚又有大鑊嘢囉！

香港政改決戰時刻，中央派出最頂級「高手」坐鎮，竟是個曾經管香港唔掂的「失敗者」，又老又懵又有痛症的病患者，即係好輕視香港啫！

同時，亦反映出香港廢柴政府之無能，仲要靠董先生幫腔叫陣！大家痛苦也！

唉！當廢柴也要拿來透火助燃，即使係一路燒一路出煙，熏得大家眼濕濕也不管的時候，怎叫人不滴淚吖？

喂！我之淚流滿面，跟「一個人出山」無關，而係心痛香港今時今日的處境，直情係「香港出殯」呀！嗚嗚！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府