城中鏡:楊永仁最愛Colorful靚車
「洋參大王」楊永仁鍾意靚車,有幾鍾意?佢名下有十一部靚車,當中有全亞洲唯一一部蘋果綠色嘅林寶堅尼,部勞斯萊斯係粉藍色,法拉利係鮮黃色,架架都咁「Colorful」,好難唔吸引路人眼球,但近來佢瞓身投入恒發洋參嘅業務,已經少咗揸。佢話自細已經鍾意揸車,若然要數最貴嗰部,必定係上年先買入嘅蘋果綠林寶堅尼,索價超過八百萬元。
楊永仁同佢部蘋果綠林寶堅尼一出現,即惹來途人艷羨目光。
凌晨兜風避人潮
貴為恒發洋參主席,楊永仁好忙,六月至完成上市,至今都未得閒抖吓,所以近排已經少咗揸。見佢啲車,好多都係跑車,之但係香港馬路人多車多,咪嘥咗啲跑車?佢話:「以前會趁凌晨出街兜幾轉,四點幾五點嗰陣最少人!」佢仲話「鍾意靚嘢」,所以除咗名車,佢仲有一艘遊艇,仲鍾意儲中國古董添,真係嗜好多多!