教育局前政治助理楊哲安嘅太太張新悅尋日出席一個公開活動，見到腹大便便嘅佢仲着住五吋嘅高跟鞋，一啲都冇唔自然，亦唔怕會扭傷腳喎，佢仲透露隨時都準備分娩嘞！

張新悅話臀部大，個馬紮得穩，所以着高跟鞋冇有怕。

話時話，佗住B女嘅佢真係藝高人膽大，之前拖住對寶貝女去遊船河，早前仲參加「冰桶挑戰」嘅慈善行動，大淋冰水添！大肚婆淋冰水，怕唔怕影響個胎呀？但佢笑說：「其實大肚婆係唔怕凍，老公都冇問題，仲一齊淋，反而坐月時就要好乖。」但佢又食榴槤喎，佢話榴槤係補身，其實健康係自己控制嘅。

佢又話兩個囡囡都係自然分娩，所以呢胎都希望係順產。佢又自爆有開刀恐懼症，覺得開刀仲危險！問到佢依家重咗幾多磅？佢話：「我都係重咗二十幾磅，依家百三磅。」咁仲着高跟鞋？佢就話：「我臀部比較大，個馬紮得穩，唔使擔心。」

第一手消息請下載on.cc東網iPhone/iPad/Android/Windows Phone Apps