城中鏡：翡翠分享會 名太呻走寶
有「翡翠皇后」之稱嘅仁濟醫院前主席董吳玲玲早前舉辦咗場翡翠分享會，吸引城中名人靚太齊歡聚。中華總商會永遠名譽會長蔡冠深太太Janice蔡關穎琴自爆當年結婚時，蔡冠深曾提議到緬甸競投未開嘅玉石，度身訂造定情飾物，點知Janice嫌翡翠玉石老土，寧願揀選鑽石。近年翡翠愈升愈有，難怪佢笑嘆當年走晒寶。
鍾情珠寶設計嘅王雲仙（左）同榮利玉器珠寶太子女葉寶婷拎住未經雕琢嘅玉石細心研究。
董吳玲玲（右）舉辦翡翠分享會，蔡關穎琴自爆當年唔識貨趣聞。
莊哲猛（右二）同莊太駱英英（左二）帶兩個囡囡菲娜（左一）及莎娜齊去捧場。
蔡關穎琴：依家先識欣賞
分享會由香港國際翡翠珠寶鑑定中心顧問蘇崇祐主講，佢仲帶來未經雕琢嘅各種玉石畀大家開吓眼界。董太亦出動私人珍藏，由靚女模特兒行騷展示，令現場增添唔少貴氣。到場嘅仲有大律師陳清霞同南京社團總會會長張心瑜，仲有鍾情設計珠寶嘅博愛醫院永遠顧問藍國慶太太王雲仙。蔡關穎琴話隨着年紀慢慢成熟先至識得欣賞翡翠，但翡翠太矜貴，平時只係穿戴粗嘢，真正靚嘢擺放喺保險箱欣賞喎！
董太嘅好友香港福建同鄉會永遠名譽會長莊哲猛、莊太駱英英、大女Fiona莊菲娜同細女莊莎娜亦去交流心得。Fiona同丈夫百仁基金副會長Johnny楊華勇三個月前添咗第二名BB，講起家庭即難掩幸福之情。Fiona話細仔幾個月大已升格做表哥，因為Johnny家姐亦啱啱添丁，屋企加埋大女共有三個BB，歡笑聲不停，最開心莫過於老爺楊孫西同楊太喇！
