政壇：南區區會舉牌認人有創意
雖然議會向來予人硬繃繃嘅感覺，但南區區議會就搞搞新意思，日前喺區議會網頁上載一張團體相，相中每人都攞住印有唔同圖案嘅紙牌，究竟玩乜嘢呢？南區區議員柴文瀚話，由於區議會開會場地呈長方形，當後排有人舉手發問時，坐喺最前面嘅主席經常因為太遠而睇唔到，於是區議會秘書心生一計，按照每位區議員屆內軼事或關注議題，為佢哋設計獨一無二嘅規程查詢牌。
南區區議會搞搞新意思，日前喺區議會網頁上載一張牌團體相。（互聯網圖片）
好似柴文瀚喺區議會內出名關注南港島線延誤問題，秘書就整咗個港鐵圖案畀佢；羅健熙早前喺自己議員辦事處門口被警察查身份證，所以富幽默感嘅秘書就為佢整咗個盜賊圖案。至於之前在海怡西補選中勝出嘅新丁議員Judy陳家珮，因為喺選舉期間着粉紅色戰衣，秘書因此而整咗個印有粉紅色風褸圖案嘅規程查詢牌畀佢，獲Judy大讚夠晒細心又夠創意。
