漏報可以好大鑊，但勢估唔到有人會「報住先」！我哋翻查立會議員個人利益登記冊，發現議員鍾樹根申報兩個機構贊助月餅送贈長者，本來近中秋節派月餅好正常，但佢喺九月一日申報尋日獲一個機構贊助五百個月餅，唔通佢「未卜先知」？

鍾樹根

樹根九月一日申報分別於上月三十日同尋日，獲煤氣公司同中國商業管理顧問學會，分別贊助八百個同五百個月餅，贈送予柴灣興華二邨、峰華邨同景翠苑嘅長者。樹根話負責幫佢申報嘅職員放大假，唔知係咪咁樣，所以要「報住先」。佢仲講笑話如果唔見咗啲月餅，佢點都會出錢補番數喎。

除咗「報住先」，我哋仲睇到另一個「亮點」，就係佢送月餅嗰三個屋苑，都係公文袋東區區議員黎志強嘅選區。地區消息話，樹根已派咗社區幹事去挑戰黎志強，早前更喺嗰度開咗個立法會議員辦事處，睇嚟黎志強競逐連任隨時要打硬仗嘞！

第一手消息請下載on.cc東網iPhone/iPad/Android/Windows Phone Apps