政壇：鄭承隆同新民黨斬纜

Edwin坦言冇辦法繼續同田二少合作，更承認積極考慮喺田二少嘅愉景選區插旗打對台。據知田二少嘅前助理、現已過檔工黨嘅趙恩來亦有意參選該區，三人混戰真係大把戲睇喇。

Edwin尋日寄信後向我哋透露早已計劃退黨，講起退黨原因，Edwin句句有骨咁暗指田二少當正個黨係「私人企業」咁管理兼過橋抽板，佢自言唔係田二少嘅「伙記」，二人好難合作，希望盡早了斷，為自己前路打算。雖然準備退黨，但佢不忘多謝主席葉劉淑儀過去多次從中調停，退黨對葉劉嚟講，亦係解脫咁話。

不過，田二少反指「搲穿頭都唔知『鄭生』講乜」，直指已經年幾冇見過Edwin，批評佢懶散、入黨以來乜都冇做過，仲話「成個黨都唔知佢做乜」，如今退黨只好講句「尊重佢嘅決定」啦！至於兩位前黨友均有意硬撼，田二少笑言歡迎競爭，最重要做好自己喎，自信心爆棚。

高達斌未搞掂退黨

講開退黨，一直聲稱已經同新民黨「斬纜」嘅愛港之聲主席高達斌，原來一直未正式退黨，定時定候仲收到該黨電郵。新民黨發言人話，從未收過高達斌退黨通知，當然唔會貿然踢佢出黨啦，而高達斌亦承認自己疏懶，以為講咗等如退咗黨。

田二少就唔介意高達斌唔斬纜，最緊要對方唔好以該黨身份發言就得喇！