競爭排名無寸進 政治紛爭更添憂

呢，世界經濟論壇又派全球競爭力成績單喇，香港雖然幸保不失，仲係排第七，但係比排第二嘅「宿敵」新加坡，差咗一大橛，認真羞家。報告警告話，香港喺專上教育、創新、科研等方面仍有「改善空間」，尤其喺創新方面，排名由第二十三重挫到第二十六；專上教育排名跌得更慘，原來排第三十四已經夠肉酸，今次居然跌到第四十三，直頭難睇到痹喇。

畫公仔唔使畫出腸，「改善空間」其實係婉轉批評，即係唔掂咁解。嗱，就講專上教育呢筆，有國際高等教育研究機構早前公布亞洲大學排行榜，曾連續三年榮登榜首嘅香港科技大學急跌至第五位，而「百年老店」香港大學亦由舊年第二位跌到第三位，而新加坡國立大學就成功晉升亞洲一哥。有人話，教育成敗可以反映一個地方命運興衰，呢啲咪就係香港沉淪嘅證明囉。

正所謂，衰開有條路，競爭力停滯不前、大學排名急跌只係冰山一角，更令人擔憂嘅係，政治環境愈來愈惡劣，香港沉淪速度加快，係咁落去，勢必萬劫不復，冇得翻身。

無計喇，香港正處於多事之秋，人大常委會早幾日為香港政改一錘定音，反對派揚言要發動連串抗爭，困擾本港超過一年半嘅「佔中」鬧劇隨時上演，罷課、街頭抗爭將無日無之。建制派同反對派勢如水火，衝突一觸即發，經濟同民生淪為政治爭拗陪葬品，你話市民唔擔憂就假。

本港經濟其實已經處於衰退邊緣，內地經濟放緩，加上部分政客喺背後煽動所謂「驅蝗」行動，令旅遊同零售持續不景氣，零售數字更連跌六個月，一旦佔中成事，經濟必受重挫，香港玩完一啲都唔出奇。

唔係靠嚇o架，呢嗱，人大常委會就香港政改拍板之前，國際評級機構標準普爾確認本港AAA主權信貸評級，但話到明，如果本港政治兩極化局面惡化，會考慮降低主權信貸評級。山雨欲來，烏雲壓城，AAA主權信貸評級睇怕隨時凍過水。

話時話，現屆政府管治無能，施政混亂，加上行政立法關係惡劣，政策幾乎「推出一項、跪低一項」，跟住落嚟仲有佔中同連串抗爭，加埋政客喺議會拒絕合作，處處作梗，改善施政更加係諗都唔使諗。太一叮都係嗰句，香港沉淪避無可避，攪亂檔嘅就係歷史罪人，叮！