城中鏡：蔣怡赴英進修 翁狄森湊女力撐
珠寶設計師翁狄森尋日出席藝術活動，佢透露依家正忙於湊女，事關太太蔣怡將會到英國藍帶廚藝學院讀廚藝一年，佢要父兼母職，佢話：「其實生之前佢都想去，我同佢講唔好因為個女冇咗夢想，佢廚藝好好，我同佢一齊十四年，佢煮嘢冇重複過，絕對入得廚房，出得廳堂。」
翁狄森因太太蔣怡將到英國讀廚藝，近日忙於湊女。
咁老婆仲會唔會繼續模特兒嘅工作？翁狄森話太太已經冇做模特兒嘅工作七年嘞，向來都係喜歡拍劇做主持，台灣演藝界都稱呼佢做藝人。再追問佢蔣怡去英國學廚藝，咪要同囡囡分隔一年時，佢話個女依家歲幾都穩定，同埋佢三個月會返嚟一次嘅。咁會唔會再生小朋友呀？佢坦言有保留，但又話想喎，等太太讀完書先算喎！
