城中鏡：鄧鉅明要囝囝由低做起
太子珠寶鐘錶主席Jimmy鄧鉅明同太太鄧宣宏雁、大仔Alan鄧亦軒同藝人Emme黃伊汶尋日出席《太子珠寶鐘錶呈獻World Brand Piazza 2014揭幕典禮》，Jimmy透露集團已係第五年參與，公司亦將有大規模發展。講到大仔Alan同二仔Arthur鄧亦棋都喺其集團工作，佢坦言兒子要由低做起，又話：「大仔以前由低做起，依家先做董事，二仔就起步中，賣好平嘅錶。以前我捱過，佢哋讀書比我多，希望佢哋可以喺每一個部門都試過。」
鄧鉅明夫婦同兩個仔喺活動中合照。
黃伊汶
提到太太榮升集團副主席同執行董事，Jimmy亦大讚在公在私太太好幫得手：「太太為公司做咗好多事，包括設計同宣傳上，係實至名歸。唔使講有冇送禮物，每日都係佢生日。屋企方面佢真係無微不至，我自己不嬲都一心一意唔多心，所以佢都好放心。」佢直言二人結婚多年相處好開心，相信二十年後都會繼續。而太太直言自己有三重身份，包括係鄧生嘅生意夥伴、太太同埋三個小朋友嘅媽咪，所以要分配時間照顧家人。
Alan透露已擔任集團董事兩年多，主要參與董事局決策同鐘錶業務，爸爸亦有教佢唔好怕蝕底。依家單身嘅佢話現階段為公司拚搏，有時間就去打羽毛球。
