城中鏡：霍家添丁童心再現
香港青年聯會尋晚舉行新一屆就職禮，霍啟剛繼續冧莊做主席，同場仲見到青聯副司庫霍啟山同常務會董霍啟文，就嚟係中秋節，梗係問吓佢哋一家過節有冇乜嘢與別不同啦！啟文話，原來佢哋以前中秋節除咗會燒祭品拜祖先外，細個仲會順便燒埋啲舊功課；至於啟山就貫徹本身嘅喜好，中秋節都掛住踢波，當然兩人唔及啟剛多咗個囝囝陪過節咁開心！
霍啟山（左）同啟文自小過中秋節就已經一齊玩。
霍啟剛（左）同范駿華將會拍住上，一齊推動青年事務。
青聯一班靚女成員喜事接二連三。左起：副秘書長周沁、梁煒茵、彭蘊萍、吳嘉汶同常務副秘書長羅詠詩。
啟山仲話，由於今年霍家多咗一個新成員過中秋，所以即使佢哋十幾年冇玩過燈籠，今年可能會買番個送畀姪仔，等姪仔感受吓傳統中秋節係點樣。不過，啟剛就話已經買咗十幾個燈籠畀囝囝玩喇，仲連同無限父愛一齊送上。新任常務副主席范駿華就話中秋都會同家人齊齊食團圓飯，享受家庭樂。
青聯女將 喜事重重
講到未來一年喺青聯嘅工作，范駿華就躊躇滿志，話希望多啲同年輕人溝通，嚟緊會以十多人一組嘅形式加強與青年對話，將工作做得更仔細。至於青聯女成員方面，好消息接二連三，三位靚女仲一齊交換佗Ｂ心得，分別係即將於十一月生Ｂ女嘅成員Iris梁煒茵、預產期明年一月嘅常務會董吳嘉汶同明年二月分娩嘅會董Anita彭蘊萍。雖然懷孕時期要盡量遠離化學物，但三位女士化淡妝一樣明艷照人。
