大搜查：老住戶憂無命等修葺
舊樓僭建情況常見，不少居民均寄望透過樓宇更新大行動全面清拆僭建物及進行維修，以改善居住環境，惟因屋宇署執法不力，令年老住戶擔心有生之年仍無法等到安居之日。
鴨寮街舊樓平台亦搭有鐵皮屋逾七年，被指阻礙大廈維修。
去水位疑因僭建污水渠有問題出現倒灌現象，林婆婆坦言單位廚房經常水浸。
「等多幾多個七年？」
林婆婆家住深水埗鴨寮街一幢有逾三十年樓齡的大廈，多年前已發現單位下層平台搭有僭建物，更疑非法接駁污水渠，令林婆婆長期受臭味滋擾，「個僭建物頂仲鋪滿垃圾，惹晒蚊蟲，搞到我成日病！」林坦言原以為大廈納入樓宇更新大行動目標樓宇後，情況會得到改善，未料苦等多時，最終美夢落空。
「屋宇署投訴咗七年，但到依家啲僭建物都仲喺度，就算大廈可以申請資助做維修，都因為僭建物未拆，搞到好多工程都唔可以申請。」一直跟進事件的當區區議員劉佩玉稱，由於屋宇署遲遲未能取締大廈僭建物，法團只能將相關的維修及清拆工程剔出招標文件，「就係因為屋宇署唔做嘢，搞到啲舊樓就算申請到樓宇更新大行動都做唔到維修。好多居民都好似林婆婆咁係老人家，佢哋只係想要個安樂窩，政府究竟仲要佢哋等多幾多個七年？」
本報於今年五月向屋宇署查詢事件，惟至截稿前仍未有任何回應。市建局發言人則證實，有關大廈法團的顧問公司曾提出處理清拆違例建築物的建議，惟最終未有被納入工程招標文件。
