SUN搞作：打橫嚟講：香港年輕人榜樣
在一個謊言偽語滿天飛的愁城裏，沒有必要將任何事宜政治化而令自己忟憎。電視台的選美節目，本屬商業行為，任何環節的設計，只係想勾引觀眾的噱頭，例如，佢哋高調聲稱「給予全港市民『一人一票』選冠軍」，其實係想七百萬人同時黐住個電視機的把戲而已！即等於電視台送名廠新車給觀眾作餌，留住佢哋不轉台啫！認真，便輸了！
有評論指出無綫這個CCTVB，藉今日中共政權在港硬推「一人一票」假普選的政改鬧劇，趁機獻媚，幫手宣傳，緊貼阿爺路線，大搞小圈子篩選，讓港人「習以為常」，欣然接受，遂死咗都唔知乜事喎！
哼！世事無常，即使CCTVB「真係」咁契弟，暗地裏「出賣港人」，但偏偏「人算不如天算」的！那最受港人愛戴的大熱門（11號吳凱欣），卻被五個所謂星級評判篩出三甲以外，無得「入閘」；而呢五件替港人打頭陣作預選三甲的「港人代表」（評判），又不是香港人公投選佢哋做代表個喎！只係由CCTVB欽點佢哋嘅之嘛！成個都係名副其實的「小圈子」選舉，如果咁都係有預謀幫政府宣傳「政改方案」的話，CCTVB高層就係政治低能兒了！
以前，出爐新港姐，係以「智慧與美貌並重」見稱的高貴形象示人，今劑的，似個民初大宅門內的「妹仔」，或現今中環Office內的辦公室助理，幸好，佢亦有自知之明，話自己的志願，想做「年輕人的榜樣」，弊嘞！香港青年聯會主席霍啟剛大公子出席政改論壇時表示，都唔知點界定「青年」，因四十五歲都係呢個會嘅成員。
或許，我畀啲建議啦！家陣的年輕人榜樣，係有獨立思想、愛香港本土、以香港福祉為尚、敢向偽語大話精和賤格權貴說不的，其代表係「學民仔」，希望港姐敢以佢哋為榜樣吧！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
