資訊科技嘅發展一日千里，真係未必追得咁貼，但講到底網絡安全先係最重要，唔單止係普通嘅使用者，對政治人物嚟講就更加係必須認識嘅課題，否則一不小心，隨時被黑客「剝光豬」o架！

設計圖片及對白

好似立法會資訊科技界議員Charles莫乃光同人民力量「慢必」陳志全，近日都收到一封假扮成「港大政治與公共行政學系」嘅學生電郵，話正在製作「百大香港政治人物」專題網站，想佢哋click入去網頁，核對吓資料係咪正確喎。

Charles話晒係科技界人士，邊有咁易中招吖，一睇就知呢類係「釣魚電郵」，佢話如果就咁打開封郵件，都唔會出事，但通常電郵附帶一條link，如果click入去或輸入某啲資料就會中招，成個電郵信箱都會被黑客入侵。佢仲話近期唔少同事都收到呢類「釣魚電郵」，有啲騙徒仲聲稱自己係「政府資訊科技總監辦公室」，又引佢睇外國女星艷照，似乎騙局經過精心設計，奉勸大家小心為上。

第一手消息請下載on.cc東網iPhone/iPad/Android/Windows Phone Apps