政壇：李小加為滬港通搞講座
滬港通下月殺到，各監管機構都嚴陣以待，確保呢場世紀「大製作」順利上演。除咗監管機構、市場人士外，股民係咪都準備好搭呢架「直通車」，亦都係頭號大事，故證監會旗下投資者教育中心同由李小加做行政總裁嘅港交所，今個月二十二號便合辦一個滬港通免費講座，畀公眾人士報名參與，名額有三百多名，先到先得，有興趣股民要快啲報名。
下個月滬港通殺到，李小加當然會睇到實喇！（資料圖片）
其實港人買A股，猶如隔山買牛，好多散戶可能連A股上市公司啲名都未講得出，莫講話了解A股市場同香港市場究竟有乜差異。所以呢次講座，內容會包含多個主題，好似係滬港通買賣A股與港股嘅分別、A股市場嘅特色同風險、散戶投資者應留意嘅滬港通規則同法例、同埋有乜投資者保障等等。好啱A股市場「初哥」去聽。
投資者教育中心會視乎股民反應，係咪考慮再舉辦相關講座。中心也會製作教育短片，等股民更加了解滬港通運作。
但股民要注意，呢個講座唔係股東會，唔會設茶點招待，股民要專心聽Talk（講座）呢！
