政壇：鍾南山難忘霍英東善行

喺沙士一役而聲名大噪的廣州呼吸疾病研究所前所長鍾南山，尋日下晝大約四點鐘現身灣仔一間酒店咖啡室，細心一看，同佢一齊歎茶嘅係已故全國政協副主席霍英東嘅三仔霍震宇。點解佢哋會相約茶敍？鍾南山話霍英東曾捐二千萬元畀研究所建立重症加護室（即ICU），咁啱ICU喺○二年十一月底完工，十二月廣州即開始出現沙士病例，ICU即時大派用場，所以先可以咁快喺翌年五月控制疫情。佢諗起都覺得霍英東好有遠見，所以尋日一嚟到香港就同霍震宇約埋閒談。今日佢會出席一個中醫藥研討會，隨即就會轉飛德國展開下一站嘅行程。