SUN搞作：打橫嚟講：八月十五，公民抗命？
香港特區官場內乜嘢最多？梗係廢柴庸才啦！
班學民仔設計咗一紙宣傳單張，解釋何謂「公民抗命」，準備印製八萬份，因想慳錢，遂透過郵政署的平價通函郵寄服務，寄給各區十大屋苑住戶。
點知，畀郵政署拖延兩星期後的回覆，話郵政署署長親自過目後，以傳單內容未能符合《投寄條款及須知》第3.7條的規定，即「任何人不得投寄任何違法、不道德、令人反感的文字、圖片或其他東西」。
唉！呢啲庸才廢柴，有正經嘢唔去做，卻小事化大，攪亂香港，叫香港蒙羞。老老實實，我哋啲郵箱日日都收到好多垃圾宣傳郵件o架啦！咪睇都唔睇，厲手掉咗佢！依家，你老哥一嘢「政治審查」，令全港報紙大字標題，加埋電子媒體，咪仲多過八萬人聽學民仔解釋「公民抗命」的理念囉！同時，不論郵政署點解釋，也肯定此乃「政治審查」的一次打壓也！
這幾頁紙的單張，由頭到尾也只在客觀闡述「公民抗命」的概念，沒有煽動他人違法，又如何不道德呢？而令人反感的文字和圖片，又怎及得有鼠王芬或掃把頭等玉照的競選傳單呀！但你郵政署署長又唔制止？若咁「通識」的單張都禁，將來不要說議員和特首選舉的宣傳郵件，那麼，學校通識課仲可唔可以講甘地、馬丁路德金或耶穌的抗暴事迹呢？
返回法律層面，作為郵政署署長濫權錯判，亂屈「郵件」違法，咁佢有乜法律理據吖？有無徵詢過律政司呢？
如果投件人發動一人一信（實體信）寄去聯合國投訴，搞大件事，咁香港郵局是否會「依法辦事」，自己幫手告自己呢？幾好笑！定係又話人「不道德」而「罷工」拒寄呢？
當連郵政署都唔「政治中立」時，民間起義，須得將便條塞入月餅內做餡，秘密革命矣！
其實，我哋媽叉一班又一班政府廢柴係無用嘅，三幾日後，咪又不了了之！各位，你話點算呢？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
