SUN揭秘：豆花割喉戰 街坊大贏家
同行如敵國永遠是商界定律，街坊小店亦不例外！荃灣一間開業不足一年的豆品店，日賣過千碗豆腐花，生意滔滔不絕，突然有人差一腳分一杯羹，在鄰舖開業，首周更以免費豆腐花作招徠，舊店為保生意惟有割價迎戰，一場豆品店大戰仍未分勝負，但最大贏家，就肯定是一眾街坊。
新店開業首周，舊店生意大跌七成。
新店老闆 鄭先生：「希望同街坊分享到兒時嘅味道。」
舊店老闆 李先生：「惟有靠維持產品質素留住客人。」
記者採訪當日，是一個閒日的下午，舊店門外異常冷清，沒有客人，只有店員默默等候客人，「隔籬舖頭未開前，我呢度大把人排隊買豆腐花，但依家呢邊就變得好靜！」原來，旁邊新開業的豆品店以免費派豆腐花作宣傳。雖然近日免費派豆腐花活動已告結束，但又展開新一輪減價戰。
「我哋呢間豆品店開業九個月，已經積落唔少熟客，高峰期更日賣千六碗豆腐花，由朝到晚做到踢晒腳。」舊店老闆李先生不諱言，自從鄰舖豆品店開業，生意就大幅滑落。「呢個星期，我哋生意得番三成，每日賣得三、四百碗豆腐花，班夥計為咗呢件事，都覺得好大壓力。」
新店老闆：隨時變成豆腐花街
李所賣的豆腐花原價為七元，然而新店卻僅賣五元。「唔通隔籬賣緊五蚊，我哋仲堅持賣番原價咩？」李先生對此大感無奈，「為咗迎接挑戰，我哋已經調整價格，豆腐花一樣減到五蚊。」面對一浪接一浪的攻勢，李先生承認感到壓力，對前景更憂心忡忡，「唔單止生意量跌咗，價格又賣平咗，真係擔心會做唔住！依家唯一可以做嘅，就係維持產品質素，留住客人！」
免費派豆腐花可能被視為攪亂檔？新店老闆鄭先生指純屬宣傳手法，只求開業首周成為街坊焦點，「荃灣本身係一個舊區，所以我想喺呢度賣番中國傳統食品；而且自己細細個已經好鍾意食豆腐花，希望同街坊分享到兒時嘅味道。」至於選擇在同類店舖旁開業被視明搶生意，鄭認為只是給街坊多一個選擇。
鄭坦言：「其實兩間豆腐花店開埋一齊，我覺得對大家都會有好處，完全屬於良性競爭；情況就好似波鞋街之嘛，開埋一齊反而吸引更多外來客，呢度隨時會變成『豆腐花街』添呢！」
現時兩間豆品店各有擁躉，大戰最終是雙贏還是雙輸，至今仍是未知之數。但肯定的是，在這場減價戰中，一眾街坊最受惠。
