設計圖片及對白
財經事務及庫務局上月向政策局及部門首長發出內部通告，要求各部門由一六/一七年度起，連續兩個財政年度削減百分之一開支。但原來立法會都不能幸免，要跟大隊減少百分之一開支。根據行政管理委員會年報，截至舊年三月三十一日，立會全年開支為六億六千三百多萬元，如果同意削支要求，秘書處每年將要使少六百六十三萬元，兩年共削減一千三百多萬元。
據了解，行管會唔少委員都反對當局要求削支嘅安排，理由係因為立會唔隸屬於任何政府部門，如果立會聽政府話削支，咁就唔可以履行監察政府嘅角色。議員劉慧卿亦表明立會有其憲制地位，當局唔可以將立會同其他政府部門相提並論，亦唔應該將用喺政府部門嘅守則套用喺立會身上，要求財庫局局長陳家強同行管會開會商討問題。
決定向當局上訴
雖然秘書處決定會向當局提出上訴，但原來秘書處已有兩手準備，以防政府當佢哋嘅訴求無到。首先，秘書處會推行一系列電腦化政策，減少負責接待訪客嘅職員數目，又會凍結部分職位招聘及研究工作，盡量精簡秘書處人手，務求慳得幾多得幾多。咁搞法，秘書長陳維安梗係要頂住先喇！
不過，立會依家坐擁一億一千九百三十二萬元儲備，每年仲不斷要政府注資，再加上每年幾百萬元嘅投資收益，要削減兩年共千零萬開支簡直係濕濕碎。
議員不時鬧爆政府部門唔肯開源節流善用公帑，但自己就一味大花筒，淨係每位議員每年嘅酬酢津貼都有十九萬元，七十名議員已花一千三百多萬元，足夠冚咗兩年削支條數有凸，但依家反而要秘書處開源節流削減前線人手及研究工作，真係離晒譜囉！
第一手消息請下載on.cc東網
