政壇：庫克出新機前減持蘋果

市場對新iPhone嘅期望，推動Apple股價近期節節上升，股價闖上新高之餘，亦帶挈行政總裁庫克先賺一筆，喺每股一百美元以上出售一批股份套現近三千萬美元。

庫克呈交畀美國證交會（SEC）嘅文件顯示，佢喺本月二十四日有一批五十六萬股有限制股份「解封」，轉手出售二十九點零八三四萬股，售價為一百零一點三二美元。售股後，庫克手上仍然直接持有八十八點零七六七萬股Apple，按周二收市價一百點八九美元推算，約值八千八百八十六萬美元。

其實庫克套現之前幾天，Apple股價先啱啱衝上一百美元，係自六月拆細後首見，最高曾升至一百零二點一七美元。

庫克喺出新機前減持Apple，未必同佢對股價後市嘅睇法有關，因為佢之前都試過為交稅而售股。