政壇：海洋公園高層齊淋冰水
最愛扮嘢嘅海洋公園前主席盛智文，上星期啱啱接受完「冰桶挑戰」，接任個多月嘅新主席孔令成為證明自己一樣玩得，尋日就同副主席劉鳴煒、行政總裁苗樂文出嚟接受挑戰，齊齊淋冰水，希望引起大家對肌萎縮性脊髓側索硬化症（ALS）關注。公園嘅吉祥物威威獅令、熊貓盈盈、樂樂公仔，亦齊齊登場，幫手將冰水兜頭淋。
一眾吉祥物同孔令成（中）等海洋公園高層齊齊大玩淋冰水挑戰。（受訪者提供）
苗樂文講起呢個活動就好有感觸，因為佢外父四年前因為肌肉萎縮症過身，所以好明白呢個病對患者家屬帶嚟嘅影響。
苗樂文仲話海洋公園除咗會捐款畀香港肌健協會外，亦會邀請肌肉萎縮症患者同家屬免費遊覽公園。海洋公園為延續呢項慈善活動，所以決定再「Tag」埋香港迪士尼樂園、香港會議展覽中心同海昌控股有限公司，睇嚟又多三個機構嘅善長要「找數」嘞！
