由立法會議員梁美芬做主席嘅西九新動力，一向都好關注本港海濱發展及水質問題，佢哋耐唔耐都會去抽海水樣辦做水質測試，監察本港水質。梁美芬尋日又去到新油麻地避風塘抽水，真係一路抽一路聞到陣陣臭味。佢抽完水返到附近私人屋苑嘅海濱長廊時就好感觸話，個海濱長廊有樹又有草地，但水質有臭味就好似一個靚女離遠睇好靚，但行到埋去先發現原來係臭嘅一樣，大殺風景喎。
梁美芬（左二）見到啲海底泥，就諗起朋友去完中東送畀佢敷面嘅死海泥。
屯門望后石污水處理廠故障，搞到啲污水排出大海，引起大家對污水處理嘅關注。梁美芬尋日去新油麻地避風塘抽水兼抽淤泥外，仲向有關官員提交附近居民簽名，希望當局關注水質同臭味問題。佢話呢個活動一早就籌備，似乎想證明自己唔係「抽水」博曝光。
不過，梁美芬對抽水同抽淤泥真係親力親為，仲將又黑又臭嘅淤泥攞畀記者睇。佢又話有朋友去中東旅行時買過啲死海泥面膜送畀佢，但香港嘅海底泥就唔可以用嚟敷面喇。
第一手消息請下載on.cc東網
