政壇：黑英隔山打牛反三跑
究竟喺赤鱲角嘅香港國際機場應唔應該興建第三條跑道（三跑）？坊間有好多唔同意見，當中因為工程會影響水質同海洋生態，尤其對附近中華白海豚有威脅，環保團體就大力反對，其中天文台前台長「黑英」林超英亦喺反對行列之中，佢唔單止喺出席電台節目、書展或各類型活動都聲嘶力竭咁反對，尋日佢仲喺網誌上話，屯門望后石污水處理廠洩漏污水凸顯三跑對水污染嘅影響，佢真係唔放過任何一個反對三跑嘅機會。
設計圖片
黑英話，其實望后石污水處理廠洩漏污水，已經惹起公眾對青山公路沿岸泳灘污染情況嘅關注，但如果冇赤鱲角機場嘅話，部分污染仲可以通過水流，從珠江口向南流出大海，咁青山公路沿岸海灘嘅污染程度仲可以稍為減低。不過，有咗機場之後，污水一流到青山公路以南海面，就會被困在「內海」，如果將來加埋第三條跑道，水流出內海同珠江口之間嘅通道時，會碰到更大阻力，以致水污染衰多兩錢重咁話。
指機場加劇海灘污染
佢認為機場管理局冇乜嘢說話可以講，因為機場令污染物難以流出大海，以致海灘污染比以前嚴重，而且將來第三跑道更會加劇阻礙污染物離開嘅情況，影響不只限於青山公路沿岸，連東涌、馬灣同屯門三角海域都會受到影響，所以黑英就質問機管局係咪真係認為自己一啲責任都冇，起三跑係咪真係一啲都影響唔到環境，質疑只係機管局睇唔到喎。
污水處理廠係渠務署負責嘅，當然署長鍾錦華責無旁貸，要盡快處理好今次事故，亦都要防止意外再發生，而黑英今次擺明係想隔山打牛，借鍾錦華嚟插機管局喇，機管局署理行政總裁吳自淇收到未呀？
